د فواید عامې رئیس ملا محمد عیسی ثاني په کابل کې د ازبکستان له سفیر ایبک عثمانوف سره وکتل او د افغانستان او ازبکستان ترمنځ د اوږدمهاله اقتصادي او سوداګریزو اړیکو په اړه یې خبرې وکړې.
د فواید عامې وزارت د معلوماتو له مخې، د هرات – مزارشریف د اورګاډي کرښې بیا رغونه او د بلخ – هرات د اورګاډي کرښې د مطالعاتو موضوع هم په دې ناسته کې مطرح شوه.
د دغه وزارت په وینا، دواړو لورو د دواړو هېوادونو ترمنځ د اقتصادي او سوداګریزو اړیکو د پیاوړتیا او د ریل پټلۍ د معیاري کولو په برخه کې د هر اړخیزو همکاریو پر دوام ټینګار وکړ.
