د اسرائیلو پوځ ادعا کړې چې په تېرو څو ساعتونو کې توانېدلی چې د لبنان په جنوب کې د علي الطاهر په لوړو سیمو کې د حزبالله اړوند زیربناوې تر خپل عملیاتي کنټرول لاندې راولي.
د خپرو شویو راپورونو پر بنسټ، اسرائیلي ځواکونه د فرعي تونلونو له لارې په دې سیمه کې د حزبالله د «عماد» په نوم توغندیزې اډې ته ننوتلي دي؛ هغه اډه چې د لبنان په جنوب کې د حزبالله له مهمو توغندیزو او قوماندې مرکزونو څخه ګڼل کېږي.
همدارنګه راپور ورکړل شوی چې د حزبالله ځواکونه له دغو لوړو سیمو څخه شاتګ کړی دی؛ د علي الطاهر لوړې سیمې د خپل لوړ موقعیت او پر نبطیه ښار د پراخې څارنې له امله د لبنان د جنوب له ستراتیژیکو سیمو څخه ګڼل کېږي.
دغه راپورونه لا تر اوسه د خپلواکو سرچینو له خوا په بشپړه توګه نه دي تایید شوي او نه هم رد شوي دي.
