د شمالي کوریا د مشر کیم جونګ اون د روغتیا په اړه په ټولنیزو شبکو کې د اوازو له خپرېدو وروسته، د دغه هېواد رسنیو د هغه تازه انځورونه خپاره کړي دي؛ خو تر اوسه هېڅ باوري سرچینې د هغه مړینه نه ده تایید کړې.
د جنوبي کوریا د یونهاپ خبري اژانس د راپور له مخې، دغه انځورونه د ۲۰۲۶ کال د اکتوبر په ۱۹مه، دوشنبې په ورځ خپاره شوي دي. په انځورونو کې کیم جونګ اون له خپلې لور، جو اې، سره په پیونګیانګ کې د جامو او بوټونو د نندارتون له ځای څخه د لیدنې پر مهال لیدل کېږي.
تر دې وړاندې، په ټولنیزو شبکو کې د کیم جونګ اون د روغتیايي وضعیت د خرابېدو، په بېجینګ کې د هغه د درملنې او مړینې په اړه ناتایید شوې ادعاوې خپرې شوې وې؛ خو د دغو ادعاوو د تایید لپاره باوري شواهد نه دي وړاندې شوي.
