یوې لوېدیځې رسنۍ د څو امریکايي چارواکو په حواله راپور ورکړی چې د امریکا دفاع وزارت له اروپا څخه د الوتکو، بېړیو، پوځي تجهیزاتو او شاوخوا ۲۵ زره امریکايي سرتېرو د ایستلو طرحه ارزوي؛ هغه اقدام چې په اروپا کې د امریکا پوځي حضور شاوخوا یوه پر درېیمه برخه کمولی شي.
که دا طرحه عملي شي، دا به په اروپا کې د سړې جګړې له پای ته رسېدو راهیسې د امریکا د پوځي حضور تر ټولو ستره کموونه وي.
د دې احتمال له امله د ځینو اروپايي هېوادونو اندېښنې راپورته شوې دي؛ په ځانګړي ډول په داسې شرایطو کې چې د روسیې او د ناټو د غړو هېوادونو ترمنځ ترینګلتیاوې دوام لري.
کرملین څو ځله ویلي چې روسیه د هېڅ هېواد لپاره ګواښ نه دی، خو ټینګار یې کړی چې د دغه هېواد امنیت او ګټې له ګواښ سره مخ کوونکي اقدامات به له پامه ونه غورځوي.
