د حکومت د اطلاعاتو او رسنیو مرکز اعلان وکړ چې د بین الوزارتي پانګونې کمېټې منظمه غونډه د سې شنبې په ورځ (۱۹ غبرګولي ۱۴۰۵) د مرمرین په ماڼۍ کې ترسره شوه.
په دې غونډه کې، د جوزجان ولایت په مرکز شبرغان ښار کې د ښاروالۍ په ځمکه د سوداګریزو بازارونو د جوړولو پلان بیاکتنه وشوه او د هر اړخیزې ارزونې وروسته د منلو وړ وګڼل شو.
د دې پلان له مخې، خصوصي سکتور به د درې پوړیز سوداګریز بازار د جوړولو لپاره شاوخوا ۲۳ میلیونه افغانۍ پانګونه وکړي چې ۵۴ دوکانونه به پکې شامل وي.
همدارنګه، په دې غونډه کې، د کابل په اوومه ناحیه کې د دارالامان سړک ته نږدې د ښاروالۍ په ځمکه د استوګنې او سوداګریز کمپلکس د جوړولو پلان هم بحث شو.
له بیاکتنې وروسته، دا پلان د تخنیکي او مالي ارزونو لپاره اړوندو څانګو ته واستول شو ترڅو وروستی راپور یې په ټاکل شوي وخت کې د بین الوزارتي پانګونې کمېټې ته وسپارل شي.
#افغانستان #جوزجان #شبرغان #پانګې اچونې #تجارتي_بازار #کابل
