بي بي سي راپور ورکړی چې په برتانیا کې اووه افغان اتباع، چې د کډوالۍ حیثیت یې د کډوالو په توګه ثبت شوی، د ماشومانو سره د دې ډلې د ناوړه ګټه اخیستنې په تړاو له ۴۰ تورونو سره مخ شوي دي.
د راپور له مخې، شپږ تورن کسان ۲۰ کلن او یو بل ۲۱ کلن دی، چې د نورویچ او ډمبارټون په ښارونو کې د امنیتي ځواکونو له عملیاتو وروسته نیول شوي دي.
برتانوي پولیسو ویلي چې دا کسان د ۲۰۲۳ کال د اګست او ۲۰۲۵ کال د می ترمنځ د دوو تنکیو نجونو سره د ناوړه چلند په تور نیول شوي دي.
راپور زیاته کړې چې اووه تورن کسان پرون د نورویچ د مجسټریټ محکمې ته حاضر شول او یوازې خپل نومونه یې تایید کړل.
