د اسلامي امارت د سرحدونو، قومي او قبایلي چارو وزیر نورالله نوري په یوه اعلامیه کې ویلي چې د فرضي ډیورنډ کرښې په اوږدو کې اغزن تار د افغانانو لپاره د افغانانو په سینه باندې د اغزن تار په څیر دی او دوی به یې هیڅکله ونه مني.
ښاغلي نوري دا څرګندونې د سیاسي شنونکو، قومي مشرانو او د پوهنتون استادانو سره په یوه غونډه کې وکړې او ټینګار یې وکړ چې افغانستان له پاکستان سره رسمي پوله نلري او دا موضوع په څرګنده توګه څو ځله بیان شوې ده.
د سرحدونو چارو وزیر زیاته کړه چې اوسنی نظام د خلکو له منځ څخه رامینځته شوی او د دوی همکارۍ او ملاتړ دې مرحلې ته رسیدو کې بنسټیز رول لوبولی دی؛ دا نظام د ټولو افغانانو پورې اړه لري او د هیواد ټول اتباع پرته له کوم توپیر څخه مساوي ګڼل کیږي.
نورالله نوري وویل چې د اسلامي امارت له واکمنۍ وروسته، د هیواد په بیلابیلو برخو کې په زرګونو قومي او سیمه ایزې شخړې حل شوي او د سرحدونو د ساتنې لپاره جدي اقدامات شوي دي.
