د افغانستان د اسلامي امارت د کانونو او پټرولیم وزیر ملا هدایت الله بدري د هرات ولایت د غوریانو ولسوالۍ د نمکسر سیمې د پنځم بلاک لپاره د رحماني زرخانزوی د مالګې کان کیندنې شرکت سره قرارداد لاسلیک کړ.
دا قرارداد د ۱۰.۵۱ مربع کیلومتره ساحې لپاره د ۵ ملیون او ۳۴۲ زره امریکایي ډالرو پانګونې سره د ۱۵ کلونو لپاره لاسلیک شو.
د قرارداد له مخې، د هر ټن مالګې لپاره امتیاز ۱۵۰۰ افغانۍ ټاکل شوی او شرکت ژمنه کړې چې د قانون، کان کیندنې طرزالعملونو او خپلو مکلفیتونو سره سم فعالیت وکړي.
د امتیاز د ورکړې سربیره، یاد شرکت د ټولنیزو خدماتو او چاپیریال ساتنې چمتو کولو ته هم مکلف دی او شاوخوا ۱۱۰ کسانو ته به کار پیدا کړي.
