د نورستان د والي ویاند فریدون صمیم له رسنیو سره په مرکه کې اعلان وکړ چې د یوې ښځینه ډاکټرې او د هغې د زوی جسدونه، چې د اختر په لومړۍ ورځ د پاکستاني پوځي رژیم د برید په پایله کې شهیدان شوي وو، د دوی کورنیو ته وسپارل شول.
د صمیم په وینا، دا کسان هغه وخت شهیدان شول کله چې د دوی لېږدونکی موټر د نورستان ولایت د کامدیش ولسوالۍ په باغیچه سیمه کې تر مستقیم برید لاندې راغی.
دا برید په داسې حال کې وشو چې اسلامي امارت مخکې د کوچني اختر په مناسبت د “د ظلم د ردولو” دفاعي عملیاتو د لنډمهاله بندولو اعلان کړی و؛ خو د پاکستان رژیم د ملکي وګړو پر وړاندې خپلو بریدونو ته دوام ورکړ.
د نورستان د والي ویاند دا عمل د اوربند ښکاره سرغړونه او د ملکي وګړو پر وړاندې جرم وباله او ټینګار یې وکړ چې امنیتي ځواکونه په بشپړ ډول په تیارسۍ کې دي.
