د عوایدو فدرالي بورډ (FBR) اعلان کړی چې د افغان ټرانزیټ سوداګرۍ کارګو چې د میاشتو راهیسې په چمن او کوټې کې بند پاتې وو اوس د بیا صادراتو لپاره د کراچۍ او قاسم بندرونو ته لیږدول کیدی شي.
ایکسپریس ټریبیون راپور ورکړی چې د پاکستان او افغانستان اصلي سرحدي بندرونه د ۲۰۲۵ کال د اکتوبر له ۱۰ (۱۸ میزان ۱۴۰۴) راهیسې د سرحدي نښتو له امله تړل شوي وو او د کراچۍ بندرونو څخه د افغانستان ټرانزیټ سوداګري وځنډول شوه.
په یوه بیان کې، FBR ټینګار وکړ چې د بیا صادراتو لپاره د ټولو بند پاتې کارګو “بیرته لیږد” ته اجازه ورکړل شوې او دا عملیات به د ګمرک چارواکو تر نږدې څارنې لاندې ترسره شي.
د نویو لارښوونو سره سم، ټرانسپورټ شرکتونه باید رسمي غوښتنلیک وسپاري او هر کاروان به اعظمي حد 15 موټرونه ولري، چې د ګمرک افسر به ورسره وي.
په وروستیو میاشتو کې د ټرانزیټ سوداګرۍ اوږدمهاله ځنډ افغان او پاکستاني سوداګرو ته درانه زیانونه اړولي دي، په زرګونو کانټینرونه د کراچۍ په بندر کې بند پاتې دي.
