اترا د افغان بېسیم او افغان ټیلیکام سره د ۸ نویو مخابراتي سایټونو د جوړولو قرارداد لاسلیک کړ
د افغانستان د مخابراتو تنظیموونکې ادارې (اترا) د افغان بېسیم او افغان ټیلیکام سره د ۸ نویو مخابراتي سایټونو د جوړولو قرارداد لاسلیک کړ؛ د دې پروژې موخه د هیواد په لرې پرتو او محرومو سیمو کې د مخابراتو او انټرنیټ خدماتو پراخول دي.
د قرارداد له مخې، افغان بېسیم په ارزګان، هلمند، بلخ، پکتیکا او غور ولایتونو کې د ۷ سایټونو د جوړولو مسؤلیت لري، او افغان ټیلیکام به د کندز ولایت په دشت ارچي ولسوالۍ کې یو سایټ جوړ کړي؛ د دې پروژې ټول لګښتونه به د اترا د پراختیایي بودیجې لخوا ورکړل شي.
د اترا چارواکو ټینګار وکړ چې د سولې او ثبات له اوسني فضا څخه په ګټې اخیستنې سره، په ټول هیواد کې د مخابراتو او انټرنیټ پوښښ د پراخولو هڅې به ګړندۍ شي او په لرې پرتو سیمو کې به د خلکو لپاره اساسي مخابراتي او انټرنیټ خدماتو ته لاسرسی د پام وړ ښه شي.
د هېواد په کچه د مخابراتو د لاسرسي پروژه (د ۵۳۰ مخابراتي سایټونو د جوړولو په ګډون) هم په چټکۍ سره دوام لري، او تر اوسه پورې له ۳۰۰ څخه زیات سایټونه بشپړ شوي او په کار اچول شوي دي.
