د افغانستان د اسلامي امارت د عامې روغتیا وزارت اعلان وکړ چې د لومړي ځل لپاره په کابل کې د سرطان د تشخیص او درملنې لپاره د ۲۰۰ بستریز ملي روغتون پرانیستل شو او په فعالیت یې پیل وکړ.
د پرانیستې په مراسمو کې، د عامې روغتیا وزیر مولوي نور جلال جلالي وویل: دا روغتون د ګډې همکارۍ له لارې رامینځته شوی او د سرطان ناروغانو لپاره به د امید او درملنې سرچینه وي.
هغه زیاته کړه چې د کورنیو متخصصینو د روزنې لپاره به ډیر ژر ځانګړي روزنیز پروګرامونه پیل شي او د هند په همکارۍ به د راډیوتراپي خدمات چمتو شي؛ هند تر دې دمه د ۱۰ ټنو درملو او طبي تجهیزاتو په ګډون یو ملیون ډالر مرسته کړې ده.
د روغتیا وزیر له خلکو، پانګوالو او خیریه موسسو څخه وغوښتل چې د سرطان ناروغانو په ملاتړ کې همکاري وکړي.
د روغتیا خدماتو مرستیال وزیر مولوي عبدالولي حقاني ټینګار وکړ چې په تیرو څلورو کلونو کې د روغتیا خدماتو د پیاوړتیا لپاره اغیزمن ګامونه اخیستل شوي او د شریکانو په همکارۍ هڅې روانې دي ترڅو د درملنې لپاره بهر ته د اتباعو د سفر مخه ونیول شي.
د سرطان د ملي پروګرام مشر ډاکټر محمد شفیق امین د دې روغتون پرانیستل د سرطان د درملنې په برخه کې د نویو پرمختګونو پیل وباله او ویې ویل: “نن موږ د امید دروازې پرانیزو.”
د اروپايي ټولنې استازي هم په دې مراسمو کې حاضر وو او د سرطان د تشخیص او درملنې په برخه کې یې د دوامداره همکارۍ ډاډ څرګند کړ.
