د افغان برېښنا شرکت اجرایوي رییس ډاکټر عبدالباري عمر د کابل شنه صنعتي پارک کې د ۳۴ میګاواټه لمریزې برېښنا پروژې د پرانیستې په مراسمو کې اعلان وکړ چې د دې پروژې په بشپړیدو سره به په پارک کې د صنعتکارانو د برېښنا ستونزې په بشپړه توګه حل شي.
ښاغلي عمر زیاته کړه چې د برېښنا تولید لپاره د پراخو هڅو سربیره، په ټول هیواد کې د معیاري وېش شبکې او لوړ ظرفیت لرونکي سب سټیشنونو د جوړولو لپاره کار روان دی؛ د هغه په وینا، د مصرف شبکې په پراختیا کې ملیاردونه افغانۍ پانګونه کیږي ترڅو تولید شوې او وارد شوې انرژي په منظم ډول خلکو ته ورسیږي.
د افغان برېښنا شرکت اجرایوي رییس ټینګار وکړ چې د معیاري شبکو جوړول به د کمزوري ولتاژ، د برېښنا تخنیکي او سوداګریز زیانونو په څیر ستونزې کمې کړي.
هغه دا هم یادونه وکړه چې د کابل د برېښنا اوسنی شبکه د یو ملیون خلکو اړتیاوو پوره کولو لپاره ډیزاین شوې، مګر د پلازمینې د ۶ ملیون څخه ډیر نفوس او د تولیدي فعالیتونو د زیاتیدونکي پراختیا په پام کې نیولو سره، د برېښنا تولید نورې پروژې پلي کول اړین دي.
