د جوزجان ولایت امنیتي چارواکو راپور ورکړی چې د جوزجان-بلخ او جوزجان-سرپل لویو لارو کې په دوو جلا ترافیکي پیښو کې ۱۲ کسان ټپیان شوي دي.
د جوزجان د پولیسو د قوماندانۍ ویاند قاري عبدالستار حلیمي رسنیو ته وویل چې دا پیښې د شنبې په سهار ( ۶ مرغومې ۱۴۰۴) رامنځته شوې.
په لومړۍ پیښه کې، د جوزجان-بلخ په لویه لاره څلور ګړندي موټرونه ټکر شول، او په دویمه پیښه کې، درې ګړندي موټرونه د جوزجان-سرپل په لویه لاره کې له یوې بار وړونکې لارۍ سره ټکر شول.
هغه زیاته کړه چې په دې پیښو کې ټولټال ۱۲ کسان ټپیان شوي او د درملنې لپاره د جوزجان ولایتي روغتون ته لیږدول شوي دي.
د جوزجان د پولیسو د قوماندانۍ ویاند وویل چې د دې پیښو اصلي لامل د موټر چلوونکو بې احتیاطي او د ترافیکي قوانینو نه مراعات کول وو.
