د پاکستان د جمعیت علمای اسلام ګوند مشر مولانا فضل الرحمن، د “د پاکستاني امت یووالي” تر سرلیک لاندې د هیواد د علماوو په غونډه کې، د کابل او اسلام آباد له حکومتونو وغوښتل چې د دواړو هیوادونو ترمنځ تاوتریخوالی او اختلافات د خبرو اترو او سیاسي حل لارو له لارې حل کړي.
فضل الرحمن د پاکستان په پوځي پالیسیو سختې نیوکې وکړې او ټینګار یې وکړ چې د دښمنانو د په نښه کولو په پلمه په افغانستان برید کول د توجیه وړ نه دي.
هغه د پاکستان پوځ ته په خطاب کې وویل: “که تاسو په کابل برید وکړئ په دې پلمه چې ستاسو دښمن هلته شتون لري، نو ولې ستاسو غبرګون توپیر لري کله چې هند په پاکستان کې خپل دښمنان په نښه کوي؟”
د جمعیت علمای اسلام مشر زیاته کړه چې د کړکیچونو دوام د دواړو خواوو په ګټه نه دی او د کړکیچ څخه د وتلو یوازینۍ لاره د ګاونډیو هیوادونو ترمنځ خبرې اترې، تفاهم او متقابل درناوی دی.
دا څرګندونې په داسې حال کې راځي چې د افغانستان او پاکستان ترمنځ اړیکې په وروستیو میاشتو کې له جدي ننګونو سره مخ شوي دي، په شمول د وسله والو ډلو د ساتلو متقابل تورونه.
د خبرونو اړوند ویډیو د لاندې لینک څخه وګورئ
https://t.me/SafirTelevision1/27578
