د فلسطین په سیمو کې د ملګرو ملتونو ځانګړې راپور ورکوونکې فرانسسکا البانیز وویل چې د غزې د بیارغونې بشپړ مسؤلیت د اسراییلي رژیم او د هغه د اصلي ملاتړو په غاړه دی.
البانیز ټینګار وکړ: “د غزې د بیارغونې لګښت باید اسراییل ورکړي، او د متحده ایالاتو، جرمني، ایټالیا او انګلستان په څیر هیوادونه هم باید پدې مسؤلیت کې شریک شي، ځکه چې د اسراییلو لپاره د دوی نظامي او سیاسي ملاتړ دوام لري.”
د ملګرو ملتونو او نړیوال بانک د لومړنیو اټکلونو له مخې، په غزه کې د جګړې له امله رامینځته شوي ویجاړۍ د بیارغونې لګښت د 50 ملیارد ډالرو او 80 ملیارد ډالرو ترمنځ اټکل شوی، چې دا د عصري تاریخ ترټولو ګران بیارغونې پروژو څخه دی.
دا څرګندونې په داسې وخت کې راځي چې د غزې د جګړې له پیل راهیسې له یو کال څخه ډیر وخت تیر شوی او په سیمه کې ډیری زیربناوې ویجاړې شوې دي.
