- د اسلامي امارت د بهرنیو چارو وزارت اعلان وکړ چې د افغانستان لپاره د اروپايي ټولنې نوي ځانګړي استازي ګیلس برټرینډ د هیواد د بهرنیو چارو وزیر امیر خان متقي ته په یوه غونډه کې له افغانستان سره د اروپايي ټولنې د مرستو د دوام ډاډ ورکړ.
د بهرنیو چارو وزارت د مطبوعاتي اعلامیې له مخې، ښاغلي برټرینډ د ملي امنیت، سیاسي ثبات، اقتصادي پرمختګ او د میلیونونو راستنیدونکو کډوالو د منلو په برخه کې د اسلامي امارت د څلورو کلونو لاسته راوړنو ستاینه وکړه او د اقتصادي همکاریو په زیاتولو، په ځانګړې توګه د افغان خصوصي سکتور په ملاتړ یې ټینګار وکړ.
هغه په افغانستان کې د لویو اروپايي شرکتونو د پانګونې د راجلبولو لپاره د ګډې همکارۍ غوښتنه هم وکړه.
امیر خان متقي د بشري مرستو په برخه کې د اروپايي ټولنې د پخواني استازي د هڅو ستاینه هم وکړه، په تیرو څلورو کلونو کې یې د لویو زیربنایي پروژو پلي کولو ته اشاره وکړه، او د افغانستان د جامع پرمختګ په لاره کې یې د اروپايي ټولنې د نورو مثبتو ګامونو غوښتنه وکړه.
