د کډوالو د حل عالي کمیسیون اعلان وکړ چې پرون (د لېندۍ ۱ مه ۱۴۰۴) په ټولیزه توګه ۱۱،۸۵۵ افغان کډوال له ایران او پاکستان څخه په زوره هیواد ته راستانه شوي دي.
د اسلامي امارت مرستیال ویاند ملا حمدالله فطرت د دې کمیسیون د کمیټو ورځنی راپور په خپل ایکس پاڼه کې خپور کړ او لیکلي یې دي چې دا کډوال، چې له ۲،۱۰۲ کورنیو څخه جوړ دي، د اسلام کلا (هرات)، پل ابریشم (نیمروز)، سپین بولدک (کندهار)، بهرامچه (هلمند) او تورخم (ننګرهار) له پولو څخه هیواد ته داخل شوي دي.
د دې راپور له مخې، په همدې ورځ، ۲،۲۸۷ نورې کورنۍ (۱۳،۲۴۶ کسان) خپلو اصلي سیمو ته لیږدول شوي او ۱۷۶۰ کورنیو ته نغدي او غیر نغدي مرسته ورکړل شوې ده.
همدارنګه، د مخابراتي شبکو ۱۰۶۰ سیم کارتونه کډوالو ته وویشل شول.
په وروستیو اونیو کې له ایران او پاکستان څخه د افغان کډوالو په لویه کچه راستنیدل په چټکۍ سره زیات شوي، او د کډوالو د حل عالي کمیسیون د اړوندو ادارو سره په همغږۍ کې د دې کورنیو لپاره د استوګنې او مرستې چمتو کولو لپاره کار کوي.
