د پنجشیر ولایت د پولیسو قوماندانۍ د ولایت په پریان ولسوالۍ کې د ۱۴۷ کیلوګرامه اپین د نیولو اعلان وکړ.
د پنجشیر د پولیسو قوماندانۍ ویاند حقمل سعد وویل چې دا اندازه مخدره توکي په مهارت سره په یوه سیډان ډوله موټر کې پټ شوي وو او د کره استخباراتي معلوماتو پر بنسټ ترلاسه او ضبط شول.
د هغه په وینا، ټاکل شوې وه چې دا مخدره توکي له بدخشان ولایت څخه د پنجشیر له لارې کابل ته ولیږدول شي.
ویاند زیاته کړه چې د دې قضیې په تړاو، دوه قاچاق وړونکي د مخدره توکو سره یوځای ونیول شول او د قانوني تعقیب لپاره عدلي چارواکو ته وسپارل شول.
حقمل سعد ټینګار وکړ چې د مخدره توکو د قاچاق او استعمال په وړاندې د پنجشیر ولایت د امنیتي ځواکونو مبارزه په جدي او دوامداره توګه دوام لري، او دا ډول عملیات د ټولنې د امنیت او روغتیا په ډاډمنولو کې مهم رول لوبوي.
