د عدلیې وزارت اعلان وکړ چې په مرکزي زون کې د غصب شویو ځمکو د قضیو د څېړنې ځانګړې محکمې د کابل ښار په لسمه ناحیه کې د “آریا ښارګوټي” په لومړي او دوهم پړاو کې له ۱۸ جریبه څخه زیاته ځمکه د امارت په توګه تایید کړه.
د عدلیې وزارت د دوشنبې په ورځ (۲۸ تله ۱۴۰۴) په خپله ایکس-پاڼه کې ولیکل چې ځانګړې محکمې د “آریا ښارګوټي” په ۱۶۶ جریبه ځمکه کې اسناد او سوابقونه څېړلي دي.
د وزارت په وینا، یاد شوی ښارګوټی د کابل ښار په لسمه ناحیه کې موقعیت لري او د ځمکو د غصب مخنیوي کمیسیون مخکې له دې موضوع څېړلې وه او په رسمي ډول یې خپله دوسیه ځانګړې محکمې ته سپارلې وه.
د محکمې د پریکړې له مخې، د اسنادو، ریکارډونو، د املاکو دفترونو او د اړوندو څانګو څخه د معلوماتو ترلاسه کولو وروسته، د ښارګوټي د ټولې ځمکې ۱۸.۲ جریبه، چې په لومړي او دوهم پړاو کې موقعیت لري، د امارت په توګه وټاکل شوه.
دا اقدام د اسلامي امارت د هغو هڅو یوه برخه ده چې غصب شوې دولتي ځمکې بیرته ترلاسه کوي او د ملکیت په چارو کې عدالت ته وده ورکوي.
