د افغانستان د اسلامي امارت امنیتي او دفاعي سرچینو اعلان وکړ چې د پاکستاني ځواکونو له خوا د هیواد د هوايي حریم د پرله پسې سرغړونو په ځواب کې، د خیالي ډیورنډ کرښې په سرحدي سیمو (پکتیا، هلمند، پکتیکا، خوست او ننګرهار په ګډون) کې غچ اخیستونکی عملیات ترسره شول.
دغه عملیات چې تېره شپه شاوخوا ۱۲ بجې پای ته ورسېدل، د لسګونو پاکستاني ځواکونو د وژل کېدو او ټپي کېدو، د پوځي تاسیساتو د ویجاړېدو او د هغوی د تجهیزاتو او وسلو د نیولو لامل شول.
سربیره پردې، د افغان ځواکونو له خوا ۱۴ پاکستاني پوځي پوستې نیول شوې دي.
د هیواد د ملي دفاع وزارت په یوه اعلامیه کې ټینګار وکړ چې دا عملیات د پاکستاني ځواکونو د پرله پسې تیریو په ځواب کې ترسره شوي او خبرداری یې ورکړ چې په راتلونکي کې به د افغانستان پر خاوره هر ډول سرغړونې ته “پریکنده ځواب” ورکړل شي.
