اروپايي ټولنې اعلان وکړ چې د هیواد په ختیځ کې د وروستۍ زلزلې له امله اغیزمنو شویو کسانو سره یې خپلې بشري مرستې زیاتې کړې دي.
د اروپايي کمېسیون د یوې اعلامیې له مخې، تر اوسه پورې څلور الوتنې چې شاوخوا ۲۶۰ ټنه اړینې مرستې یې لیږدولې دي، هیواد ته رسیدلي دي، چې وروستۍ الوتنه یې پرون (د سپتمبر ۲۲، ۲۰۲۵) کې راښکته شوه.
په دې مرستو کې یو ملیون یورو (شاوخوا ۱.۲ ملیون ډالر) بیړني تمویل او ۱۳۰ ټنه مرستندویه توکي لکه خیمې، جامې، طبي تجهیزات او خواړه شامل دي، چې د بشري شریکانو له لارې به وویشل شي.
اروپايي ټولنې ټینګار کړی چې په کونړ، ننګرهار او لغمان ولایتونو کې زیانمنو شویو کورنیو ته د بیړنیو مرستو رسولو لپاره نورې الوتنې روانې دي.
د ۲۰۲۵ کال د اګست په ۳۱مه د ۶.۰ شدت زلزلې له ۸۰۰ څخه ډیر خلک ووژل او زرګونه یې بې کوره کړل.
د اروپايي ټولنې مرسته د افغانستان لپاره د ۲۰۲۵ کال د ۱۶۱ ملیون یورو بشري بودیجې سربیره ده، چې د ۲۰۲۱ کال څخه د بشري هوایي پل له لارې دوام لري.
