د هیواد د احصایې او معلوماتو ملي دفتر اعلان وکړ چې د مرکزي دارالافتاء د پریکړې پر بنسټ، د سختو اړتیاوو په صورت کې د ښځو عکسونه په تذکرو کې لګول مذهبي او اختیاري دي.
د دې دفتر ویاند محمد حلیم رفیع رسنیو ته وویل چې د تذکرو ویش د نارینه وو او ښځو لپاره پرته له توپیر څخه ترسره کیږي او د هویت د دقیق ثابتولو لپاره د عکس ایښودل اړین دي.
هغه زیاته کړه چې ځینې هیوادونه د افغان اتباعو لپاره د سفر پرمهال د دوی په تذکرو کې عکس درلودل لازمي ګڼي.
رفیع ټینګار وکړ چې دا مسله د اسلامي امارت د مشرتابه سره له مشورې وروسته مرکزي دارالافتاء ته راجع شوه، او د پریکړې نمبر ۱۰۷۵ پر بنسټ، د سختو اړتیاوو په صورت کې د ښځو عکسونه په تذکرو کې اچول اختیاري اعلان شول.
