د هند صدراعظم نریندرا مودي د یکشنبې په ورځ (د وږی ۹مه ۱۴۰۴) د شانګهای همکارۍ سازمان په سرمشریزه کې د ګډون لپاره د چین په تیانجین ښار کې ورسید او د چین له ولسمشر شي جین پینګ سره یې ولیدل.
دا غونډه په داسې وخت کې وشوه چې د دواړو هیوادونو او متحده ایالاتو ترمنځ اړیکې د سوداګریزو تعرفو د زیاتوالي او له واشنګټن سره د جیوپولیتیک کړکیچونو له امله ترینګلې دي.
د خبري سرچینو په وینا، دا په اوو کلونو کې چین ته د مودي لومړی سفر دی او د شانګهای همکارۍ سازمان (SCO) د سرمشریزې په څنډه کې ترسره شو.
دواړو مشرانو په سرحدي سیمو کې د سولې او ارامۍ د ساتلو او د دوه اړخیزو همکاریو د پیاوړتیا پر اهمیت ټینګار وکړ.
دا غونډه په داسې وخت کې وشوه چې امریکا په هندي توکو باندې خپلې تعرفې ۵۰ سلنې ته لوړې کړې دي او د واشنګټن د فشار لاندې د نوي ډیلي او بیجینګ ترمنځ اړیکې بیا تنظیم کیږي.
ټاکل شوې ده چې مودي د سرمشریزې په څنډه کې د روسیې له ولسمشر ولادیمیر پوتین سره هم وګوري.
د شانګهای همکارۍ سازمان سرمشریزه ټاکل شوې ده چې د یکشنبې څخه تر دوشنبې پورې په دوو ورځو کې ترسره شي.
