نړیوال خوراکي پروګرام (WFP) د افغانستان څانګې خبرداری ورکړی چې هیواد به د ژمي په رارسیدو سره د لوږې له بې ساري بحران سره مخ شي.
سازمان اعلان وکړ چې د مالي سرچینو د نشتوالي له امله به د ژمي په موسم کې د ۱۵ ملیون اړو خلکو سره مرسته ونشي کولی.
د سازمان مشر جان ایلیف رسنیو سره په خبرو کې وویل چې وچکالي، د نړیوالو مرستو کمښت او د سلګونو زرو افغان کډوالو جبري راستنیدل په هیواد کې د خوارځواکۍ وضعیت نور هم خراب کړی دی.
هغه زیاته کړه چې د راتلونکو شپږو میاشتو لپاره، WFP ۵۳۹ ملیون ډالرو تمویل ته اړتیا لري، مګر تر دې دمه یې د ۲۰۲۵ کال لپاره یوازې ۱۵۵ ملیون ډالر ترلاسه کړي دي.
دا د تیر کال ۵۶۰ ملیون ډالرو او په ۲۰۲۲ کال کې شاوخوا ۱.۶ ملیارد ډالرو سره پرتله کیږي.
دا خبرداری په داسې وخت کې راځي چې د راپور له مخې، په نړیوالو مرستو کې د پام وړ کمښت او ستونزمن اقتصادي او چاپیریالي شرایطو په هیواد کې په ملیونونو خلک د لوږې او خوارځواکۍ له خطر سره مخ کړي دي.
