خوست ولایت سیمه ییزو چارواکو په خوست ښار کې د شاوخوا ۱۲ ملیونه افغانیو په لګښت د یوې ساختماني پروژې د پیل اعلان وکړ.
د خوست ښاروال مفتي شهزاد نور رشید له رسنیو سره په یوه مرکه کې اعلان وکړ چې په دې پروژه کې د ښار په لومړۍ او څلورمه ناحیه کې د شاوخوا دوه کیلومتره اوږدوالي د سړکونو اساسي جوړول شامل دي.
د ښاغلي نور رشید په وینا، دا پروژه به د څلورو میاشتو په اوږدو کې بشپړه او عملي شي.
هغه زیاته کړه چې د دې پروژې پلي کول به د ښاریانو د تګ راتګ لپاره ډیرې اسانتیاوې برابرې کړي او په نږدې راتلونکي کې به د ښار په نورو برخو کې هم د ورته سړکونو جوړول پیل شي.
په ورته وخت کې، د خوست ولایت اوسیدونکو د دې پلان هرکلی وکړ او ویې ویل چې د اوسني سړکونو خراب حالت د دوی لپاره ډیرې ستونزې رامینځته کړې دي.
د خوست ښاروالۍ د چارواکو په وینا، سږ کال د ۳۸۰ ملیون افغانیو په مجموعي بودیجه سره د ۲۹ مختلفو ساختماني پروژو پلي کول د دې ادارې په پروګرام کې شامل دي.
