د اقتصادي چارو مرستیال لومړي وزیر اعلان وکړ چې د اقتصادي کمیسیون د تخنیکي کمیټې په منظمه غونډه کې د کب نیولو سکتور د پراختیا پلان د هراړخیز بحثونو او د اوبو او انرژۍ وزارت د نظرونو په پام کې نیولو وروسته تصویب شو.
د دې پلان له مخې، په ټول هیواد کې به د کبانو ۷۷۰۰ نوي فارمونه جوړ شي، چې د کبانو د غوښې لپاره د کورني غوښتنې تر ۹۰ سلنې پورې به پوره کړي او د ۳۰۰،۰۰۰ خلکو لپاره به مستقیم او غیر مستقیم کاري فرصتونه برابر کړي.
دا پلان د وروستۍ پریکړې لپاره اقتصادي کمیسیون ته راجع شوی دی.
همدارنګه، په دې غونډه کې د کرنې او مالدارۍ سکتور د پراختیا لپاره د پالیسۍ په اړه بحث وشو، او د کرنې، اوبو لګولو او مالدارۍ وزارت ته سپارښتنه وشوه چې د اوبو او انرژۍ وزارت نظرونه په دې پالیسي کې شامل کړي او په راتلونکې غونډه کې یې وروستۍ نسخه وړاندې کړي.
