په یوه زړه بوږنوونکې پېښه کې، د جمعې په سهار د کراچۍ ښار د لیاري په بغدادي سیمه کې یوه پنځه پوړیزه ودانۍ ونړېده، چې لږترلږه پنځه کسان یې ووژل او شپږ نور یې ټپیان کړل.
د سیمه ییزو سرچینو او پاکستاني چارواکو په وینا، د ایدهي بنسټ او ریسکیو ۱۱۲۲ په ګډون د مرستندویه ډلو لخوا د ځایی اوسیدونکو په همکارۍ د هغو کسانو د ژغورنې عملیات روان دي چې ممکن لا هم د کنډوالو لاندې بند پاتې وي.
د هیواد یو لوړ پوړي پولیس چارواکي اعلان وکړ چې تر اوسه پورې پنځه مړي له کنډوالو څخه ایستل شوي او شپږ ټپیان روغتون ته وړل شوي دي.
د ایدهي بنسټ سعد ایدهي هم خبرداری ورکړ چې ممکن له ۸ څخه تر ۱۰ پورې نور خلک هم د کنډوالو لاندې بند پاتې وي، ځکه چې ودانۍ ویجاړه شوې وه.
د یادونې وړ ده چې په پاکستان کې د ودانیو د نړېدو پیښې د خوندیتوب د ټیټ معیارونو، د غیر معیاري موادو کارولو او د ودانیو د کوډونو د نه پلي کولو له امله عامې دي.
کراچۍ، چې له ۲۰ ملیونو څخه ډیر نفوس لري، په ځانګړي ډول د غیرقانوني ودانیو، ګڼې ګوڼې او ویجاړو زیربناوو له ستونزو سره مخ دی.
