د عبراني ورځپاڼې یدیعوت احرونوت ادعا کړې چې د امریکا ولسمشر ډونالډ ټرمپ به راتلونکې دوشنبه په رسمي ډول د غزې په تړانګه کې د اسراییلو او حماس ترمنځ د اوربند تړون اعلان کړي.
دا ادعا په داسې حال کې کیږي چې ځینو عربي رسنیو هم راپور ورکړی چې حماس په رسمي ډول له اسراییلو سره اوربند ته غاړه ایښې ده.
د راپورونو له مخې، وړاندیز شوی اوربند د ۶۰ ورځو لپاره د دښمنۍ د پای ته رسولو موده هم لري، چې د قطر او مصر په منځګړیتوب ترسره کیږي.
ډونالډ ټرمپ مخکې اعلان کړی و چې اسراییل د اوربند د نهايي کولو لپاره اړینو شرایطو سره موافقه کړې او له حماس څخه یې وغوښتل چې دا تړون ومني.
هغه خبرداری ورکړی و چې که وړاندیز رد شي، د حماس لپاره به وضعیت نور هم خراب شي.
په هرصورت، حماس ټینګار کړی چې هر ډول تړون باید د جګړې بشپړ پای ته رسیدو او له غزې څخه د اسراییلي ځواکونو وتلو لامل شي.
تر اوسه پورې، د دې احتمالي تړون د شرایطو دقیق جزئیات نه دي خپاره شوي، او اسراییل په رسمي ډول د یدیعوت احرونوت ورځپاڼې ادعا نه ده تایید کړې.
