د اروپايي ټولنې د دفاع کمیشنر اندریاس کوبیلیس وویل چې د روسیې سره د کومې احتمالي شخړې په صورت کې به اروپايي ټولنه په کال کې شاوخوا درې میلیونه ډرونونو ته اړتیا ولري.
کوبیلیس د انګلستان سکای نیوز ته وویل: “روسیه شاوخوا پنځه میلیونه ډرونونه درلودلی شي، نو زموږ وړتیاوې باید له دې هاخوا وي.”
هغه زیاته کړه: “د شخړې په صورت کې، موږ به په کال کې شاوخوا درې میلیونه ډرونونو ته اړتیا ولرو؛ د بې پیلوټه الوتکو د ذخیره کولو پر ځای، اروپا باید د آپریټرانو، انجینرانو او تولیدونکو ټیمونو جوړول پیل کړي چې د اړتیا په صورت کې د تولید ظرفیت لوړولو ته چمتو وي.”
له بلې خوا، په لندن کې د روسیې سفارت د پنجشنبې په ورځ اعلان وکړ چې بریتانیا په هاګ کې د ناټو په سرمشریزه کې خپله اجنډا د شخړې پر بنسټ ټاکلې وه او هڅه یې کوله چې له روسیې سره د شخړې کچه لوړه کړي.
د روسیې ولسمشر ولادیمیر پوتین هم په مکرر ډول ټینګار کړی چې مسکو “د ناټو غړو هیوادونو باندې د برید کولو هیڅ اراده نلري” او داسې عمل یې “بې معنی” ګڼلی دی.
