د تنباکو نه کارولو نړیواله ورځ؛ د ځوانو افغان هلکانو ترمنځ د تنباکو کارول مخ په زیاتیدو دي
د تنباکو نه کارولو نړیواله ورځ په مناسبت، په افغانستان کې د روغتیا نړیوال سازمان استازی اډوین سینیزا سلواډور وايي چې د تنباکو کارول د ځوانو افغان هلکانو ترمنځ مخ په زیاتیدو دي.
د روغتیا نړیوال سازمان نن (شنبه، د غبرګولی ۱۰مه) په خپل ایکس مخ کې لیکلي چې د تنباکو شرکتونه د دې موادو زیانونه د “خوږو دروغو” تر شا پټوي.
د روغتیا نړیوال سازمان استازي زیاته کړه: “په افغانستان کې، د ځوانانو، په ځانګړې توګه د تنکي ځوانانو په منځ کې د تنباکو کارول مخ په زیاتیدو دي.”
اوس د دې دورې د بندولو او د راتلونکي نسلونو د ساتنې وخت دی.”
د تنباکو نه کارولو نړیوالې ورځې په مناسبت، دا سازمان د خلکو د روغتیا او هوساینې د ساتنې لپاره د نړیوال یووالي غوښتنه کوي.
دوه کاله دمخه، د هیواد د عامې روغتیا وزارت اعلان وکړ چې ۲۷ سلنه افغانان په منظم ډول تنباکو کاروي، چې ۲.۷ سلنه یې ښځې دي.
