د ټرمپ او پوتین ترمنځ دوه ساعته خبرې اترې؛ “د روسیې او اوکراین ترمنځ د اوربند خبرې به سمدلاسه پیل شي”
د امریکا ولسمشر ډونالډ ټرمپ د روسیې له ولسمشر ولادیمیر پوتین سره د ټیلیفوني خبرو اترو وروسته اعلان وکړ چې د روسیې او اوکراین ترمنځ د اوربند خبرې به “سمدلاسه” پیل شي.
ښاغلي ټرمپ په خپل ټولنیز میډیا اکاونټ، ټروت سوشیل، کې په یوه پیغام کې لیکلي چې زنګ “ډیر ښه و،” او زیاته یې کړه: “روسیه غواړي د دې ویجاړونکي ‘وینې تویونې’ پای ته رسیدو وروسته له متحده ایالاتو سره پراخه سوداګري وکړي.”
هغه زیاته کړه: “د ولسمشر پوتین سره له زنګ وهلو سمدلاسه وروسته، ما د اوکراین ولسمشر ولادیمیر زیلینسکي، د اروپايي کمیسیون مشرې اورسولا وان ډیر لاین، د فرانسې ولسمشر ایمانویل مکرون، د ایټالیا لومړي وزیر جیورګي میلوني، د جرمني چانسلر فریدریش میرټز او د فنلینډ ولسمشر الکساندر سټاب ته په یوه جلا تلیفوني اړیکه کې خبر ورکړ، او واتیکان، د پاپ په استازیتوب، هم اعلان وکړ چې د خبرو اترو کوربه توب کې به ډیره لیوالتیا ولري. اجازه راکړئ چې پروسه پیل شي!”
