د بهرنیو چارو وزارت سرپرست امیر خان متقي عمان ته د خپل سفر په دوام کې د عمان د سلطان د دفتر له وزیر، د سوداګرۍ او پانګونې د خونې له مسوولینو او د دغه هېواد د اوقافو او دیني چارو له وزیر سره جلا جلا کتنې وکړې.
د بهرنیو چارو وزارت د عامه اړیکو رئیس په یوه خبرپاڼه کې لیکلي، چې په دې کتنه کې د افغانستان او عمان ترمنځ د سوداګرۍ او پانګونې پر فرصتونو، د دواړو هېوادونو ترمنځ د مستقیمو الوتنو د پیل او په عمان کې د مېشتو افغانانو پر ستونزو خبرې وشوې.
متقي همدا راز د عمان د سلطنت له وزير څخه وغوښتل چې په دغه هېواد کې د افغان بنديانو د حبس د مودې په کمولو کې همکاري وکړي.
په دې خبرپاڼه کې د عمان د سلطنت د وزیر له قوله ویل شوي، چې دغه هېواد به په نږدې راتلونکي کې د افغان بندیانو د بخښنې او خوشې کولو زمینه برابره کړي او په عمان کې مېشتو افغانانو ته به د قونسلګرۍ د خدمتونو په برابرولو کې د افغانستان له سفارت سره همکاري وکړي.
