د ازبکستان په ترمز ښار کې د صنعت او سوداګرۍ وزیر نورالدین عزیزي په مشرۍ د افغان پلاوي او د دې هیواد د پانګونې، صنعت او سوداګرۍ وزیر لازیز قدرتوف په مشرۍ د ازبک پلاوي ترمنځ سوداګریزه غونډه ترسره شوه.
د صنعت او سوداګرۍ وزارت وايي چې په دې غونډه کې د افغانستان په بیلابیلو اقتصادي سکتورونو کې د ازبکستان د پانګونې په اړه بحث او نظرونه تبادله شول، لکه د حیرتان په بندري ښار کې د اقتصادي-سوداګریز کمپلیکس جوړول، د خوړو تولید او پروسس کول، د چرګانو فارم، د درملو صنعتونه، د سمنټو تولید، ساختماني مواد، باغداري (د پستې باغونه کرل)، او د سبزیجاتو او میوو پروسس چې په بلخ، سمنګان او کندز ولایتونو کې د ۲۰۰ ملیون ډالرو څخه ډیر لومړني ارزښت لري.
د وزارت په وینا، د سیمې د هیوادونو په ګډون د ترمز په ښار کې د سیمه ایز نندارتون جوړول، د دواړو هیوادونو د سوداګرۍ خونو جوړول، ګمرکونه او کرنیزې همکارۍ، د دواړو هیوادونو د سوداګرو لپاره د اوږدمهاله سوداګریزو ویزو د صادرولو اسانتیاوې، او د سوداګرو د ستونزو د حل لپاره د ګډې کمیټې جوړول هغه نورې مسلې وې چې په غونډه کې راپورته شوې.
