د بلخ سیمه ییز چارواکي وايي، د دغه ولایت د غره ختونکو ټیم د بلخ په نهرشاهي ولسوالۍ کې د «الک» غره ۲۱۰۰ متره لوړ څوکۍ فتحه کړې ده.
د بلخ د بدنی زده کړو له رياست سره په همغږي د ١٣ غره ختونکو دغې ډلې پرون (جمعه د مرغومې په ١٤مه) د الک غره تر ټولو لوړه څوکه فتحه کړه.
د بلخ د غره ختلو فدراسيون مشر مومن سروري وايي، له دې اقدام څخه يې موخه په دې برخه کې د ورزشکارانو ژمنۍ روزنه او همغږي ده.
الکو غر د بلخ ولايت په نهرشاهي ولسوالۍ کې يو له لوړو غرونو څخه دی، چې د پستې ځنګلونه، ناياب مرغان، ډبرې او سختې لارې لري، چې تګ راتګ يې ستونزمن کړی دی.
