افغانستان
د کندز په دشت ارچي ولسوالۍ کې د څه باندې ۴۹۸ میلیونه افغانیو په ارزښت د سړک د جوړولو چارې پیل شوې
د اسلامي امارت د فواید عامې وزارت وايي چې د ۴۹۸ میلیونه ۶۵۴ زره ۹۱۲ افغانیو په ارزښت د کندز ولایت د دشت ارچي ولسوالۍ د سړک د پاتې برخې د جوړولو کار پیل شوی دی.
د فواید عامې وزارت د معلوماتو له مخې، دغه سړک ۱۹ کیلومتره اوږدوالی لري او په راتلونکو ۱۸ میاشتو کې به یې چارې بشپړې شي.
د دې سړک په بشپړیدو سره به د تخار ولایت اته ولسوالۍ له کندز ولایت سره ونښلول شي او له دې لارې به بلخ، سمنګان، بغلان او کابل ولایتونه هم ونښلول شي.
