د افغانستان د بیارغونې لپاره د امریکا د ځانګړي مفتش دفتر “سیګار” په خپل ۶۵ درې میاشتني راپور کې ویلي، چې امریکا به په ۲۰۲۴ مالي کال کې له افغانستان سره ۸۸۵ میلیونه ډالره مرسته وکړي.
د سیګار د راپور له مخې، د ۲۰۲۱ کال په اګست میاشت کې له افغانستانه د خپلو پوځیانو له وتلو وروسته، امریکا د افغانستان تر ټولو ستر مرستندوی هېواد پاتې شوی او له افغانستان او کډوالو سره یې ۲۱.۰۶ میلیارده ډالره مرسته کړې ده.
د دغه راپور له مخې، د امریکا متحدو ایالتونو د خپلو ځواکونو له وتلو او د جمهوري رژیم له نسکورېدو وروسته د بشري مرستو او پراختیا په برخه کې ۳.۳۳ میلیارده ډالره، د افغانستان د بشري مرستو صندوق ته ۳.۵ میلیارده ډالر او ۸،۷ میلیارده ډالره د «عملیات ښه راغلاست متحدینو» لپاره ورکړي. او همدارنګه یې په نورو برخو کې ۵.۵۳ میلیارده ډالره لګولي دي.
