په اسلام اباد کې د افغانستان سفارت په یوه خبرپاڼه کې ویلي چې د بلوچستان په دوکي سیمه کې د ډبرو سکرو په کان کې د اوو افغان کارګرانو جسدونه په کوېټه کې د افغانستان د کونسلګرۍ په هڅو د دوی کورنیو ته وسپارل شول.
په خبرپاڼه کې راغلي دي چې د شهیدانو له جملې څخه ۳ تنه یې په پاکستان کې کډوال وو چې خپلو کورنیو ته وسپارل شول او ۴ تنه نور چې د کندهار د معروف ولسوالۍ اوسیدونکي وو د چمن – بولدک، بهلولي له لارې افغانستان ته انتقال او خپلو کورنیو ته یې وسپارل شول.
په دې خبرپاڼه کې د افغانستان سفارت د پاکستان له حکومت څخه د دغې پېښې د عاملينو د نيولو او مجازاتو غوښتنه کړې ده.
