د عزیزي شرکت مالک میرویس عزیزي په خپل ایکس شبکه کې په یوه یادښت کې لیکلي چې په دوبۍ کې به د نړۍ دویم تر ټولو لوړ برج چې ۷۲۵ متره لوړوالی ولري جوړ کړي.
له سی سی ان سره په مرکه کې هغه وویل چې د “عزيزي ټاور” د جوړولو کار د روان کال په جنورۍ کې د دوبۍ د چارواکو په منظورۍ پیل شو.
ښاغلي عزیزي په دې مرکه کې وویل: موږ دوه پلانونه درلودل؛ یو د 526 مترو په ابتدايي لوړوالي سره او بل د 725 مترو په لوړوالي سره، چې تایید شوی.
د هغه په وينا، د دغه برج د جوړېدو لومړني کارونه، چې د دوبۍ د نړيوال سوداګريز مرکز په سيمه کې د شيخ زايد پر سړک موقعيت لري، په ښه توګه روان دي.
دا مهال په دوبۍ کې د خلیفه برج ۸۲۸ مترو په لوړوالي سره د نړۍ تر ټولو لوړه ودانۍ ده.
عزیزي ټاور به ۱۳۱ پوړونه ولري چې اپارتمانونه، یو لوکس اووه ستوریز هوټل او یو سوداګریز مرکز ولري.
ميرويس عزيزي وويل، د دې پروژې پانګونه له ١،٦ ميليارده ډالرو ډېره شوې، چې په پام کې ده په ٢٠٢٨ کال کې بشپړه شي.
