د افغانستان په چارو کې د پاکستان ځانګړي استازي اصف درانی اعلان وکړ چې هېواد به یې ۴۵۰۰ افغان محصلینو ته سکالرشیپونه ورکړي.
دا کلنۍ بورسونه د علامه اقبال لاهوری په نوم د ټولنیزو علومو او طبیعی علومو په برخو کې افغانانو ته ورکول کیږي.
د افغانستان په چارو کې د پاکستان ځانګړي استازي دچنگاښ په ٢٠مه، په ایکس ټولنیزه شبکه کې په یوه یادښت کې لیکلي چې افغان محصلین به د پاکستان په بېلابېلو پوهنتونونو کې زده کړې کوي.
بل خوا د پاکستان د لوړو زده کړو کمیسیون (HEC) په یوه خبرپاڼه کې ویلي، چې دغه بورسونه د دغه هېواد په لوړو پوهنتونونو کې افغانانو ته په درېیو کلونو کې ورکول کېږي.
