د افغانستان لپاره د سیمه ییزې تماس ډلې دوهمه ناسته د اسلامي امارت له حضور پرته د شنبی په ورځ (دغبرگولی ۱۹مه) په تهران کې ترسره شوه.
د ایرانی رسنیو د راپورونو پر اساس په دې غونډه کې د ایران، چین، روسیی او پاکستان استازي ګډون لري.
کورنیو رسنیو د بهرنیو چارو وزارت د دریمې سیاسي څانګې د مشر ذاکر جلالی له قوله ویلي، چې اسلامي امارت د تهران په غونډه کې د ګډون بلنه نه ده منلې.
د بهرنیو چارو وزارت د دریمې سیاسي څانګې مشر په خپله ایکس پاڼه کې لیکلي چې افغان حکومت تمه لري چې د افغانستان په اړه جوړې شوې غونډې د نویو میکانیزمونو د جوړولو پر ځای د عادي او جوړ شوي میکانیزم له لارې ترسره شي.
ښاغلي جلالی زیاته کړه چې افغان حکومت د دوحې د دریمې ناستې په اړه له اړوندو خواوو سره په خبرو بوخت دی.
