په کونړ ولايت کې د کوچني اختر په لومړۍ ورځ د يو لړ ترافيکي پېښو په پايله کې يو تن مړ او اووه ويشت تنه نور ټپيان شول.
دغه پېښې په شيګل، نارۍ، سرکاڼو، ناوې، نرنګ او سوکی ولسواليو کې د موټرونو د ټکر او د څو موټرو د چپه کېدو له امله رامنځته شوې دي.
د کونړ ولايت د امنيې قوماندانۍ د رسنيو دفتر د يوې خبرپاڼې په خپرولو سره ويلي چې په دغو ترافيکي پېښو کې يو تن مړ او اووه ويشت تنه نور ټپيان شوي دي.
خبرپاڼه د موټرونو ډېر سرعت او د موټر چلوونکو بې احتیاطي د دغو ترافیکي پېښو اصلي لامل بولي.
له بلې خوا د کونړ ولايت روغتيايي سرچينې په دغو ترافيکي پيښو کې د دريو تنو ټپيانو روغتيايي حالت د اندېښنې وړ بللى دى.
