په عراق کې د امریکا له څه باندې دوو لسیزو پوځي حضور وروسته، د دغه هېواد وروستي ځواکونه او تجهیزات د اربیل له هوايي اډې څخه ووتل او په عراق کې د «ټینګې هوډ» عملیات پای ته ورسېدل؛ رویټرز راپور ورکړی چې په عراق کې د څه باندې دوو لسیزو جګړې پر مهال شاوخوا ۴۵۰۰ امریکايي سرتېري وژل شوي دي.
دغه وتل په داسې حال کې ترسره کېږي چې د براون پوهنتون د «د جګړو د لګښتونو» پروژې د اټکل له مخې، د عراق او سوریې د جګړو لګښت تر ۲۰۲۳ کال پورې شاوخوا ۱.۷۹ ټریلیونه ډالر و او د پخوانیو سرتېرو د راتلونکو پاملرنو لګښتونو په حسابولو سره، دغه رقم شاوخوا ۲.۸۹ ټریلیونه ډالرو ته رسېږي.
امریکا په ۲۰۰۳ کال کې پر عراق د برید له لارې جګړې ته داخله شوه؛ امریکايي ځواکونه په ۲۰۱۱ کال کې له دغه هېواده ووتل، خو په ۲۰۱۴ کال کې د داعش پر وړاندې د مبارزې لپاره بېرته عراق ته ستانه شول او اوس یو ځل بیا خپل پوځي حضور پای ته رسوي.
د امریکا ولسمشر ډونالډ ټرمپ په عراق کې د دغه هېواد د پوځي حضور د پای ته رسېدو په غبرګون کې د ځواکونو وتل «د یوه ډېر لګښتي سفر پای» بللي او ویلي یې دي: «موږ بېرته کور ته ستنېږو.»
په همدې حال کې، امریکايي چارواکو د دغه ماموریت پای ته رسېدل د داعش د ماتې او عراقي ځواکونو ته د امنیتي مسوولیت د سپارلو پایله بللې ده.
د خبر اړوند ویډیو له لاندې لینک څخه وګورئ.
