وزارت امور خارجه امارت اسلامی افغانستان حمله پهپادی روز پنج‌شنبه (۶ قوس ۱۴۰۴) بر سه کارمند چینایی یک شرکت در ولایت ختلان تاجیکستان را که منجر به کشته‌شدن آنان شد، به‌شدت محکوم کرد و با دولت و مردم چین و تاجیکستان ابراز همدردی نمود.
امارت اسلامی تأکید کرد که این حمله توسط حلقاتی انجام شده که هدف‌شان ایجاد بی‌ثباتی و بی‌اعتمادی میان کشورهای منطقه است.
وزارت امور خارجه در اعلامیه خود به حکومت تاجیکستان اطمینان داد که برای شناسایی عاملان واقعی این رویداد، تبادل اطلاعات و ارزیابی مشترک آمادگی کامل دارد.
دیروز حکومت تاجیکستان اعلام کرده بود که یک طیاره بی‌سرنشین حامل نارنجک و سلاح گرم «از خاک افغانستان» پرتاب شده و سه کارمند چینایی را هدف قرار داده است.
وزارت امور خارجه تاجیکستان این حمله را به «گروه‌های جنایتکار» فعال در افغانستان نسبت داده و از امارت اسلامی خواسته بود اقدامات مؤثر برای تأمین امنیت مرزها انجام دهد.
